ខេត្តព្រះសីហនុ៖ ស្ត្រីជនជាតិថៃដែលប្រឌិតរឿងពាក់ព័ន្ធថាមានក្រុមជនជាតិចិនចាប់បង្ខាំងបូមឈាម និងវះយកសរីរាង្គ នៅខេត្តព្រះសីហនុ បានចេញមុខសារភាពទទួលស្គាល់កំហុស និងធ្វើការសុំទោសជាសាធារណៈចំពោះនគរបាលកម្ពុជា និងនគរបាលថៃកាលពីថ្ងៃទី១៨ ខែមីនា ឆ្នាំ២០២២។

ក្នុងសំលៀកបំពាក់ពាក់វ៉ែនតាខ្មៅ ពាក់ម៉ាស់ និងរុំខ្លួនដោយខោអាវជិតមើលមិនស្គាល់ ស្ដ្រីម្នាក់នោះមិនត្រូវបានអនុញ្ញាតឱ្យបង្ហាញឈ្មោះដល់អ្នកការសែតទេក្នុងសន្នីសិទសារព័ត៌មានដែលធ្វើឡើងរួមគ្នាដោយនគរបាលកម្ពុជា និងថៃកាលពីថ្ងៃសុក្រនោះ។

នាងបានថ្លែងក្នុងសន្នីសិទនោះថា ការប្រឌិតរឿងបែបនេះ៖ «គឺមានគោលបំណងចង់ឱ្យនគរបាលថៃជួយឱ្យនាងបានទៅប្រទេសថៃវិញក្រោយពីលួចឆ្លងដែនចូលមកធ្វើការនៅប្រទេសកម្ពុជាដោយខុសច្បាប់»។

ឧត្តមសេនីយ៍ទោ Surachat Hakparn បាននិយាយថាស្ត្រីរូបនេះអាចប្រឈមមុខនឹងការចោទប្រកាន់ពីបទផ្តល់ព័ត៌មានមិនពិតដល់ប៉ូលីស ដែលជាបទល្មើសដែលអាចប្រឈមនឹងការជាប់ពន្ធនាគារអតិបរមាចំនួន ៣ឆ្នាំ និង/ឬពិន័យជាប្រាក់ចំនួន ៦ពាន់បាតប្រសិនបើត្រូវបានរកឃើញកំហុសមែន។

កាលពីថ្ងៃទី១២ ខែមីនា ឆ្នាំ២០២២ សារព័ត៌មានថៃ Thai Examiner បានចុះផ្សាយថាមានករណីស្រ្តីជនជាតិថៃម្នាក់បានអះអាងថាខ្លួនបានប្រឈមនឹងគ្រោះថា្នក់នៃការជួញដូរសរីរាង្គនៅកម្ពុជា។ ក្រោយចុះផ្សាយនៃក្រសួងការបរទេសកម្ពុជាបានបានចេញមុខបញ្ជាក់ថាពុំមានករណីនេះដូចការលើកឡើងនោះទេ ថែមទាំងកំពុងទាក់ទងទៅអាជ្ញាធរថៃដើម្បីស្វែងរកព័ត៌មានបន្ថែមនៃការចោទប្រកាន់នេះដែរ៕